Fréttir

Endurskoðendaráð leitar eftir gæðaeftirlitsmönnum fyrir gæðaeftirlit 2022 - 15.5.2022

Endurskoðendaráð mun framkvæma gæðaeftirlit með störfum endurskoðenda og endurskoðunarfyrirtækja á árinu 2022 í samræmi við ákvæði laga um endurskoðendur og endurskoðun nr. 94/2019 og reglur um framkvæmd gæðaeftirlits með störfum endurskoðenda, nr. 1091/2020. Gert er ráð fyrir að gæðaeftirlit fari fram í september, október og nóvember 2022.

Endurskoðendaráð leitar nú eftir gæðaeftirlitsmönnum. Í samræmi við 32. gr. laga nr. 94/2019 skulu gæðaeftirlitsmenn hafa viðeigandi menntun og reynslu í endurskoðun og reikningsskilum. Starfandi endurskoðendur og starfsmenn endurskoðunarfyrirtækja geta verið gæðaeftirlitsmenn.

Endurskoðendaráð mun halda námskeið fyrir þá sem verða valdir til að taka þátt í gæðaeftirlitinu og er áætlað að námskeiðið verði haldið fyrrihluta júnímánaðar.

Áhugasamir eru beðnir að senda inn umsóknir á netfangið endurskodendarad@endurskodendarad.is eigi síðar en þann 26. maí 2022. Í umsóknum skal gera grein fyrir menntun og starfsreynslu af endurskoðun og tengdum störfum. Þá er óskað eftir upplýsingum um þjálfun í gæðaeftirliti og reynslu af framkvæmd gæðaeftirlits. 

Staðfesting endurskoðenda á starfsábyrgðartryggingu 2022 - 10.1.2022

Samkvæmt 3. mgr. 8. gr. laga nr. 94/2019 skal endurskoðandi fyrir 15. janúar ár hvert senda endurskoðendaráði staðfestingu þess að hann hafi gilda starfsábyrgðartryggingu. Endurskoðendaráð hvetur endurskoðendur til að skila staðfestingu á starfsábyrgðartryggingu sinni vegna ársins 2022 fyrir 15. janúar nk. á netfangið endurskodendarad@endurskodendarad.is.

Próf til löggildingar til endurskoðunarstarfa fóru fram í október - 29.10.2021

Próf til löggildingar til endurskoðunarstarfa fóru fram dagana 8., 11. og 15. október 2021. Alls þreyttu 15 nemendur próf í endurskoðun og reikningsskilum og 25 nemendur próf í skattalögum, félagarétti, kostnaðarbókhaldi og stjórnendareikningsskilum. 

Þess má geta að próftakar fengu nú í fyrsta sinn heimild til að þreyta prófin á landsbyggðinni og voru próf haldin samtímis á fjórum stöðum á landinu.


Við notum kökur til að auðvelda þér að vafra um vefinn. Nánari upplýsingar. Loka kökum
Þetta vefsvæði byggir á Eplica